D’s Stächpalmelezweigli

• am e Märitstang hets schöns Material zum Dekoriere, ir Ädväntszyt tuet d’s Gschäft ordeli guet floriere,
• vom Strohstärn über sälber zogni Cherze bis zum kitschige Spielzüghung, hets schier gar für jede Gschmack öppis, sygs für alt oder jung,
• zwüsche Hortensie, Strohröseli u Tannzäpfli chöi d‘ Chunde wähle, ou Mischtelezweige und buschigi Tanneschtli dörfe nid öppe fähle,
• gar mängs vo däm vielfältige Gmisch,
  geit im Louf vo de Stunge über e Ladetisch,
• der Tag neigt sech itz am Ändi zue,
  d‘ Märitfrou isch müed, het langsam gnue,
• schuderhaft truurig, einsam und verlasse,
  liegt äs Stächpalmelezweigli hinger der Kasse,
• wott ihn’s äch niemmer choufe? das isch de scho zum Dervoloufe,
• do chunt äs alts Müeti müehselig derhäär,
  möcht öppis zum Dekoriere, chly und nid z‘ schwäär,
• em Grosi sy güetig Blick bliebt bym Stächpalmelezweigli bhange, äs gseht, wie das unschinbare Huscheli erwartigsvou tuet plange,
• so überchunt d’s Zweigli im Stubli vom Müeti sy Platz, schlicht und eifach, wohlbehüetet wie n’e koschtbare Schatz,
• grad ähnlech müesse ou mir mängisch chly warte, bis mir überchöme üses Plätzli i Himuvater’s Garte,
• Jesus isch ar Wiehnachte für aui Mönsche uf d‘ Ärde choo, het für n’es jedes vo üs gnädig d‘ Türe uftoo,
• bym Heiland zeut nid der wältlech Glanz, ÄR isch für üs do, vou und ganz,
• grad d’s Bescheidene und Schlichte, tuet by Jesus bsungerbar gwichte,
• a das wei mir dänke und no a vieu meh, we mir äs Stächpalmelezweigli gseh,
• der Heiland luegt üs mit sym Härz aa,
  aues wo mir bruuche, dörfe mir vo IHM haa,
• dank Jesus Chrischtus hei mir äs Stück Himu uf Ärde, und äs cha einisch meh Wiehnachte wärde.Thomas Lerch, im Chrischtmonet 2022